Ermal Meta, i treti në “Sanremo”

12 Shkurt 2017 - 10:02      

Kantautori shqiptar Ermal Meta fitoi çmimin e tretë në Festivalin italian të Këngës “Sanremo”. Në treshen finaliste ishte një ndër zërat më të mirë të muzikës italiane, Fiorela Manoja, por çmimin e parë e mori këngëtari Francesko Gabani.

Kënga e Metës “E ndaluar të vdesësh” ishte konsideruar që në fillim të këtij festivali si një ndër pretendentët për fitore dhe ndër krijimet me tekstin që përcillte mesazhin më të fortë.

Artisti shqiptar nga Fieri, i prezantuar në këtë edicion si një emigrant që me punë dhe pasion mbërriti deri në skenën e “Ariston”-it, solli një këngë kundër dhunës në familje.

35-vjeçari Ermal Meta fitoi këtë vit edhe çmimin për interpretimin e këngëve të vjetra italiane, ku u vlerësua nga kritika për interpretimin e këngës së Domeniko Modunjos “Amara terra mia”.

Përveç se për këngët që shkruan dhe interpreton vet, Ermal Meta është shumë i vlerësuar vitet e fundit si kompozitor, transmeton tch. Jo vetëm këngë të muzikës së lehtë, në krijimet e tij kanë nisur të zënë vend edhe kolonat zanore të filmave.