Një “Grammy” për Pirgun? [video]

2 Shkurt 2017 - 12:03      

Fundi i muajit janar ka qenë tepër i suksesshëm për tenorin shqiptar Saimir Pirgu, fama e të cilit ka mbërritur deri në Australinë e largët.

Roli i pastorit në operën “King Roger” dhe interpretim i tij kanë tërhequr vëmendjen e specializuar muzikore australiane, që thuri lavde tenorit shqiptar. Menjëherë pas interpretimit Pirgu, ndan për Top Channel emocionet e skenës përmes një bisede telefonike.

“Është hera e parë që unë ndodhem këtu dhe sigurisht që jam tepër i emocionuar pasi kam debutuar. Shfaqja ka pasur goxha sukses dhe është pritur mirë si nga publiku, ashtu edhe nga teknikët, kështu që shkalla e parë për të kapur audiencën australiane kaloi. Tani do të shohim në vijim nëse opera e Sydneyt do të presë produksione të reja”, thotë Pirgu.

Kur kanë mbetur edhe pak ditë nga ndarja e çmimeve Grammy, Pirgu thotë se trofeun e tij tashmë e ka marrë, ndërsa është i pari shqiptar që nominohet në një kompeticion të tillë në kategorinë “Best Opera Recording”.

“Ishte një surprizë tepër e madhe për mua, sepse ne të botës operistike apo të muzikës klasike, mendojmë krejt ndryshe dhe nuk kemi kontakt me botën e pop-it. Fitoj apo nuk fitoj kjo ka pak rëndësi . Vetë fakti se duke mos ditur që produksioni ishte i nominuar, për mua është e arritur ajo që ne deshëm. Produksioni është pëlqyer si në Londër, ashtu edhe në një kontinent tjetër, nga një publik krejt i ri, siç është ai i Sydney-t, kështu që produksioni i dha provat e veta, tregoi që ka sukses. Fitojmë apo jo çmimin Grammy, kjo i mbetet pak rastësisë, pak fatit, por edhe me kaq unë jam tepër i kënaqur”, rrëfen tenori.

Saimir Pirgu e bashkë me të edhe “Mbreti Roger” do të vijojnë të shijojnë suksesin australian deri në mesin e muajit shkurt në Operan e Sydneyt.