Flori i gëzuar për ngjashmërinë e këngës së tij me kolonën zanore të “La La Land”

1 Shkurt 2017 - 20:40      

Të komentosh “La La Land” nuk është e thjeshtë. Një film me superbujë dhe me po aq nominime sa “Titanic”, plot 14 duke e bërë automatikisht në krye të nominimeve “Oscar”. Publiciteteti dhe epitetet si “I mrekullueshëm”, “I mahnitshëm”, “I lavdishëm” e shoqërojnë këtë film që prej dhjetorit.

Por një pjesë e bujës së tij është përdorur së fundmi edhe nga kantautori Florian Mumajesi. Në një postim të para tre ditëve në profilin e tij zyrtar në “Instagram”, Mumajesi shpjegon se si kolona zanore e përmbylljes së filmit në piano, i sjell atij ndër mend krijimin e tij “Me fjalë të vogla”.

Pretendim jo i vogël ky, duke marrë parasysh që flitet për ngjashmëri në muzikë me një film, i cili është cilësuar nga kritika si më shumë se i bukur.

I kontaktuar nga Top Channel, Flor Mumajesi shprehet se kjo është një rastësi e madhe. Ai gjithashtu vijon se ka marrë kënaqësi nga ai pasazh i shkurtër, por jo pak i rëndësishëm, i cili shoqëron filmin.

“Ngjason në vijë melodike dhe në nota me fillimin e refrenit të këngës “Me fjalë të vogla”. Rastësi apo diçka tjetër unë nuk kam asnjë info, thjesht më gëzon fakti që ato pak nota ngjajnë me diçka të krijuar më parë nga unë”, shprehet Mumajesi për Top Channel.

I pyetur për autorësinë, ai nuk e mohon se është një rrugë e gjatë për të vërtetuar në rast se kjo është një rastësi apo frymëzim.

“Nëse ndodh të dërgojmë një email dhe të na konsiderojë do ishte shumë mirë, por nuk kam shumë shpresa”, përfundon Mumajesi.

Ndërkohë, nga ana tjetër rrugëtimi “I La La Land” dhe surprizat që mund të na rezervojë nata e madhe e Academy Award priten me kuriozitetin më të madh.