Era Istrefi merr pasaportën shqiptare

19 Janar 2017 - 19:52      

Këngëtarja e njohur Era Istrefi, që theu kufijtë e Kosovës duke shijuar sukses ndërkombëtar, ka marrë edhe nënshtetësinë shqiptare me një dekret të zyrtarizuar nga Presidenti, Bujar Nishani.

“Falënderimet e mia për Presidentin e Republikës së Shqipërisë, Ministrinë e Kulturës së Kosovës dhe Shqipërisë janë të panumërta, sinqerisht. Disa gjëra nuk do të kishin ndodhur po të mos ishte kjo pasaportë. Falënderimet e mia janë të panumërta dhe shpresoj se do ta përfaqësoj denjësisht vendlindjen time të dytë anembanë botës”, ka deklaruar Era për “Top Albania Radio”.

Më tej, këngëtarja që ka pushtuar klasifikimet europiane dhe botërore me hitet e saj, shprehet se viti 2017 do të jetë shumë i ngarkuar me evente të ndryshme muzikore. Së shpejti Era do të dalë me produksionin e saj më të ri, shoqëruar edhe me një videoklip.

“Punët e mia për vitin 2017 janë me një turne anembanë botës dhe do të kem mundësi të shkel dhe në ato vende ku duhet viza “Shengen” dhe unë tani do të përfaqësoj të gjithë shqiptarët”, thotë këngëtarja.

Në kulmin e suksesit të saj muzikor, Era Istrefi ndihet 100 për qind shqiptare dhe krenare për të përfaqësuar Shqipërinë e Kosovën kudo në botë.