Çka premton showbizi shqiptar për 2017 [video]

14 Janar 2017 - 17:36      

Duket se showbizin shqiptar po e pret një vit i bujshëm dhe se gazetarët e këtij sektori do të kenë me çfarë të merren. Kjo meqë gjatë vitit të kaluar, ngjarjet nuk patën të ndalur.

Çdo ditë jemi dëshmitarë të shkrimeve prej më të ndryshmeve nëpër mediat rozë për personazhet tona publike. E nuk ka se si të mos ndodhë kjo kur vërehet qartë se ka personazhe që janë të gatshëm pothuajse për gjithçka, vetëm për të qenë në qendër të vëmendjes. E disa të tjerë, deshën ose jo, edhe për ta flitet e shkruhet.

Gazetari Nderim Neziri thotë se në këtë mënyrë edhe ky profil ka filluar të marrë kahje serioze, ashtu siç e ka në botë, transmeton emisioni Express në KTV.

Ndarjet, ribashkimet, dashnorët e dashnoret e reja, rrahjet, burgosjet e skandale të tjera, ishin disa nga ngjarjet që e karakterizuan skenën e showbizit vitin që e lamë pas. Neziri është i mendimit se 2017-shi do të jetë vazhdimësi e disa prej këtyre ngjarjeve.

Madje, ai nuk e mohon faktin se mund të ketë edhe konflikte të reja.

Gazetari Neziri ka emrat, të cilët sipas tij, do të jenë ‘in’ këtë vit.

Këtë vit, një rikthim në muzikë e ka paralajmëruar ikona e muzikës shqiptare, Armend Rexhepagiqi. Kjo do të jetë një freski për muzikën tonë, por a mund të jetë Rexhepagiqi edhe një personazh që do të prodhojë lajme në showbiz?

Nëse dikur ishin disa personazhe që siguronin klikime, sot në ‘fron’ kanë ardhur disa të tjerë, të cilët fatkeqësisht, pa asnjë meritë, po marrin vëmendjen e disa mediave të caktuara, e rrjedhimisht edhe të një pjese të publikut.

Krejt për fund, gazetari Nderim Neziri porosit personazhet e showbizit, veçmas këngëtarët, që të jenë më të sinqertë në atë që bëjnë, pasi sipas tij, disa nga ndodhitë e vitit të kaluar kanë pasur një dozë të strategjisë dhe imagjinatës.

Adelina, Tuna, Roberti, Elvana, Flori, Blero, Soni, Ledri apo edhe të tjerë, kush do t’ia dalë? Kjo mbetet të shihet.

© KOHA. Të gjitha të drejtat janë të rezervuara.