“Andrra” këngëtarja që i jep shpirt folkut shqiptar

14 Janar 2017 - 20:28      

Me rikthimin e saj në skenën muzikore, këngëtarja Fatime Kosumi tregoi se këngët e vjetra shqiptare mund të dëgjohen edhe sot, edhe në një mënyrë tjetër. Tradicionalja dhe një ngjarje prej së vërteti është sjellë përmes këngës së titulluar "Kalle Llamën", këngë kjo që tregon historinë e një 14-vjeçare, e cila ishte martuar pa dëshirën e saj.

"Kalle Llamën" është realizuar edhe me videoklip, i cili është realizuar në Kosovë. E shumë nga bashkëpunëtorët e këtij projekti janë familjarë të vet këngëtares Fatime Kosumi, transmeton emisioni Express në KTV.

Ka vendosur të punojë më shumë në prapavijë. Këngëtarja e njohur Fatime Kosumi u rikthye në skenën muzikore shumë më ndryshe dhe e veçantë. U rikthye si "Andrra", por jo vetëm kaq, pasi këngëtarja tregoi se është shumë më shumë "Andrra".

Ajo tenton t’i ringjallë këngët e vjetra shqiptare në mënyrën e saj, bashkë me muzikantë të tjerë që bashkëpunojnë me "Andrrën".

Duket se dëshira e madhe për të shpalosur këtë traditë shqiptare nuk mbeti vetëm në këngë, por vazhdoi të shpaloset edhe përmes një dokumentari, duke udhëtuar nëpër Kosovë dhe incizuar këngë folklorike gati të harruara. "Kangë e Defa" ishte dokumentari i realizuar nga vet këngëtarja, në bashkëpunim me filmbërës të huaj, i cili u shfaq nëpër festivale, si në Kosovë poashtu edhe në Gjermani.

Fatime Kosumi, krahas këtyre angazhimeve, bëri të ditur për emisionin "Express" edhe projektet e reja muzikore.

Tash e një kohë, Kosumi është shpërngulur në Berlin, në vendin që sipas saj e përbush shumë në anën profesionale. Këngëtarja vazhdon të dëgjojë muzikë shqiptare dhe gjithnjë është në kërkim të tyre. Kjo lidhje, sipas këngëtares, edhe pse është larg familjes, është muzika shqiptare që e mban afër. "Andërr kesh në gjumë të parë", "Dashurinë që kam për ty", "Tamena" janë këngët që u publikuan fillimisht si "Andrra", të cilat u mirëpriten nga publiku.

© KOHA. Të gjitha të drejtat janë të rezervuara.