Genc Prelvukaj me album personal, a po ndahet grupi “Etnon” [video]

14 Janar 2017 - 18:23      

Është një prej grupeve që i ka mbijetuar kohës, kur bëhet fjalë për industrinë e muzikës në Kosovë. Kanë një numër të madh të publikut pas vetes e edhe projektet që kanë sjellë janë pëlqyer nga masa.

Është ky grupi "Etnon", i cili rikthimin në skenë pas një pauze disavjeçare e pati para dy vjetëve. Meqë adhuruesit e muzikës së tyre i gjetën aty ku i kishin lënë, ata sollën projekte pa ndalur, shumica prej të cilëve hite.

Si "Etnon", bashkëpunimi me Genta Ismailin, ishte i fundit nga ta për vitin që lamë pas, dhe i cili rezultoi mjaft i suksesshëm. Të suksesshëm e konsideron krejt 2016-n edhe anëtari i grupit Genc Prelvukaj.

Ai për KTV-në ka deklaruar se gjatë këtij viti do ta sjellë edhe albumin e tij personal, por që sipas tij, kjo nuk do të thotë që grupi do të shpërbëhet. Genci thotë se kjo është vetëm një strategji e tyre e menduar mirë.

Me Lyrical Son, ishte bashkëpunimi i parë i publikuar nga albumi i Genc Prelvukajt që do të lansohet në muajin maj. Do të ketë edhe shumë bashkëpunime të tjera me artistë, me të cilët kanë ide të përbashkëta në muzikë.

© KOHA. Të gjitha të drejtat janë të rezervuara.