Alexandre Nero Vieira me rol në serialin e ri në KTV [video]

21 Dhjetor 2016 - 22:08      

Duke filluar nga e enjtja në ora 21:30 në KTV fillon së shfaquri seriali më i ri brazilian, “Perandori”. Ky projekt është krijim i vitit 2014-2015, dhe në vete e ngërthen një histori të mrekullueshme që u premton shikuesve momente tensionuese dhe mjaft interesante.

E veçanta e këtij projekti përmes historisë që e ngërthen është edhe përfshirja e një ekipi të mrekullueshëm aktorësh, përfshirë këtu edhe të talentuarin, Alexandre Nero Vieira. 46-vjeçari Vieira njihet ndërkombëtarisht, por jo vetëm si aktor, por edhe si këngëtar, tekst -shkrues, aranzhues, dizajner i zërit dhe regjisor muzikor. Gjatë karrierës së tij ai ka luajtur në disa filma, seri televizive, por edhe është shpërblyer në fushën e kinematografisë me një sërë çmimesh të rëndësishme. Madje, sivjet e pati fituar një nominim për çmim Emmy në kategorinë “Aktori më i mirë”.

“Perandori” e sjell rrugëtimin e protagonistit, Jose Alfredo, të personifikuar nga Alexandre Nero, nga varfëria e skajshme deri te shndërrimi në multi-milioner. Konfliktet familjare, raporti me fëmijët, martesa e lidhur në baza interesi me Marian dhe futja në tregun e zi të diamanteve e ndjekin Alfredon në jetën e tij të re. I lodhur nga gjendja aktuale, në një kthesë fati, protagonisti i kësaj historie e gjen dashurinë e vërtetë te një grua tjetër, e cila ia rikthen pasionin për jetën.

Seriali brazilian ka marrë kritika tejet pozitive me t’u shfaqur nëpër botë, si dhe është shpërblyer me disa çmime televizive, përfshirë këtu një çmim Emmy në kategorinë “Seriali më i mirë ndërkombëtar” të cilin e fitoi në nëntor të vitit 2015.

“Perandori” fillon së transmetuari në Kohavision nga nesër dhe do të jetë pjesë e pandashme e ekranit tonë nga e hëna deri të premten në orën 21:30 minuta.

© KOHA. Të gjitha të drejtat janë të rezervuara.