Kush trashëgoi nga prindërit talentin për muzikë? [video]

21 Dhjetor 2016 - 20:30      

Disa prej këngëtarëve shqiptarë dashurinë ndaj muzikës e trashëguan nga prindërit.

Ishin të suksesshëm në kohën e tyre, këngët e të cilëve vazhdojnë të dëgjohen edhe sot. Përveç muzikës me të cilën kanë lënë gjurmë, fëmijët e tyre në një mënyrë ose tjetrën po vazhdojnë hapat e tyre.

Hapat e suksesshëm të babait të tij po i ndjek këngëtari dhe kompozitori Korab Shaqiri. I biri i këngëtarit të njohur, ishte mjaft aktiv dhe shumë shpejt u bë i njohur për publikun shqiptar.

Melihate Zeqiri shquhej për një zë të fuqishëm dhe karakteristik, zë të cilin siç duket e ka trashëguar edhe e bija e saj, këngëtarja e njohur, Dafina Zeqiri. Mjaft aktive është Dafina në skenën tonë por siç duket ajo nuk do të mjaftohet me kaq, pasi synim e ka tregun ndërkombëtar, raporton “Express” i KTV-së.

Reshat Randobrava është njëri ndër kompozitorët shqiptarë, këngët e së cilit dëgjohen edhe sot. Talentin e të atit e ka trashëguar i biri i tij, gjithashtu një kompozitor dhe këngëtar i njohur, Andin Randobrava.

Familjes së Shyhrete Behlulit kohët e fundit i është shtuar edhe një këngëtare. E bija e saj, Engjëllusha Salihu, ka vendosur që t`i futet skenës muzikore duke iu bashkuar kështu nënës së saj, se sa do të arrij të ndjekë hapat e nënës së saj drejt suksesit mbetet të shihet.
Rrugën e të atit e ka ndjekur edhe Ermal Fejzullahu. Që të dy babë e bir janë mjaft aktivë, duke lansuar kështu këngë të reja që po pëlqehen dhe komentohen nga fansat e tyre.

Përveç Melihate Zeqirit dhe Shyhrete Behlulit edhe vajza e Shkurte Fejzës ka vendosur të ndjekë hapat e nënës. Gresa Behluli është një nga këngëtarët që dashurinë dhe dëshirën për t`u marrë me muzikë e ka trashëguar nga nëna e saj.

Pas pothuajse 20 vjetësh bashkëpunim si muzikant me këngëtarin Sinan Vllasaliu, Robert Berisha vendosi të provojë veten edhe si solist. Dashurinë për muzikën edhe Roberti siç duket e ka trashëguar nga i ati. Tomor Berisha është autor i njohur këngësh.

Përveç këngëtarëve të lartpërmendur, skena kosovare është mjaft e pasur me talent të muzikës dëshirën e për të cilën e trashëguan nga prindërit e tyre.

Me talent të trashëguar apo jo, ata po vazhdojnë të jenë pjesë e skenës sonë muzikore, duke u bërë kështu edhe konkurrentë të prindërve të tyre.

© KOHA. Të gjitha të drejtat janë të rezervuara.