Charlize Theron nderohet nga “amfAR”

1 Nëntor 2016 - 19:23      

Aktorja e shpërblyer me ‘Oscar’, Charlize Theron, është nderuar në edicionin e shtatë të gala mbrëmjes bamirëse “Inspiration Gala” të organizuar nga organizata amfAR, në Los Angeles.

Chelsea Handler, Heidi Klum, Jon Hamm, Cheyenne Jackson, Dita Von Teese, Kelsey Grammer dhe Jane Lynch, ishin ndër personat të cilët e ndoqën këtë ngjarje bamirëse.

Mbrëmja po ashtu e nderoi, Jeffrey Katzenbergun, kryetarin e bordit të kompanisë “DreamWorks New Media”. Që të dy, Katzenberg dhe e dërguara speciale për paqe në Kombet e Bashkuara, Charlize Theron, u shpërblyen për kontributin e tyre në luftën kundër sëmundjes vdekjeprurëse SIDA, transmeton emisioni Express i KTV-së.

Ngjarja, e përkrahur nga kompanitë Harry Winston dhe MAC Viva Glam, arriti t’i grumbullojë rreth 2 milionë dollarë, të cilat do t’i dhurohen organizatës bamirëse “amfAR”, e cila pastaj i ndanë këto të holla për programe të ndryshme që fokusohen në hulumtimet e gjetjes së kurës për sëmundjen SIDA.

Mbrëmja nisi me një mjuzikëll të inspiruar nga studio Disney, për ta nderuar Jeffrey Katzenbergun. Një orkestër e përbërë nga 10 instrumentistë më pas e performoi këngën "Friend Like Me" dhe më pas ylli i serisë “American Horror Story”, Cheyenne Jackson, dhe ylli i serisë Glee, Jane Lynch, dolën në skenë për ta performuar këngën "A Whole New World".

Dhe në fund mbrëmja u përmbyll me një performancë eksplozive të këngëtarit të muzikës pop dhe R&B, Jason Derulo, i cili i interpretoi hitet e tij më të mëdha si: "Whatcha Say", "Wiggle", "Talk Dirty", dhe "Want To Want Me."

© KOHA. Të gjitha të drejtat janë të rezervuara.