Eliza Hoxha shpalos projektet e ardhshme muzikore [video]

7 Tetor 2016 - 21:43      

Është një prej këngëtareve të rralla shqiptare, këngët e së cilës kanë mesazhe të fuqishme dhe që në disa raste prekin edhe kauzë të caktuar.

Është kjo Eliza Hoxha, krijimet e së cilës asnjëherë nuk kanë kaluar dosido. Kanë lënë gjurmë e janë përfolur për një kohë të gjatë.

Njëjtë ndodhi edhe me projektin e saj të fundit me titull “Ecjen ti vazhdo”, i cili u dedikohet grave që luftojnë kundër kancerit të gjirit.

Kënga vjen me një videoklip të thjeshtë, por i cili flet shumë për rrugën që e përshkojnë këto gra.

Dukja e Elizës ishte ajo që u komentua shumë. Disa aluduan në transformim të vërtetë të Elizës. Këngëtarja shprehet se ndryshimi në dukje do të duhej të ishte shqetësimi më i vogël për femrat e prekura nga kjo sëmundje.

Përveç këtij, të gjitha tekstet e Eliza Hoxhës kanë mesazhe të fuqishme, janë njerëzore, derisa secili mund të gjejë vetën në një pikë të caktuar. Në një kohë pa kohë, kur industria e muzikës shqiptare gjendet në një labirint dhe dominon fjala “hit”, për Elizën ajo është diçka më shumë se kaq.

Ndryshe, Eliza prej kohësh është duke punuar në realizimin e dy albumeve muzikore, për të cilat thotë se janë në përfundim e sipër.

Të qenit para publikut dhe te kënduarit live është ajo çfarë i fle në shpirt Eliza Hoxhës, pavarësisht që këtë e bën vetëm në festivale.

Kështu, për emisionin Express në KTV, këngëtarja ka bërë të ditur që do të jetë pjesë e edicionit të sivjetmë të festivalit "Kënga magjike".

Përveç festivalit, një këngë tjetër me videoklip do të vijë së shpejti nga Eliza Hoxha.

© KOHA. Të gjitha të drejtat janë të rezervuara.