Lipa: Nuk jam në Prishtinë për para [video]

7 Gusht 2016 - 19:35      

Këngëtarja me origjinë kosovare, Dua Lipa, ndryshe, e cilësuar si fenomeni më i ri muzikor në Britaninë e Madhe, ka arritur në Prishtinë.

Këngëtarja është pritur në aeroportin ndërkombëtar “Adem Jashari” nga familjarët e saj.

Në konferencën për shtyp, Lipa ka thënë se ishte e lumtur që po rikthehej në vendlindje pas 4 vjetësh.

Kanë mbetur edhe dy ditë, që Dua Lipa do të performojë në koncertin e parë në vendlindje.

Koncerti i këngëtares kosovare me famë botërore, Dua Lipa, do të mbahet në Parkun e Gërmisë në Prishtinë më 9 gusht.

Paratë për shitjen e biletave do të shkojnë për bamirësi në Kosovë, me ç`rast mjetet e grumbulluara shkojnë në fondacionin bamirës “Sunny Hill”, të krijuar nga Dua Lipa.

Dua Lipa ka thënë se pavarësisht që Kosova ka nevojë për shumë gjëra të tjera e jo vetëm për muzikë, ajo do të mundohet të bëjë përpjekje që të ofrojë sa më shumë me artin e saj.

Në fund këngëtarja, u shpreh se e kishte marrë malli për ushqimin tradicional piten.

E lindur në Londër, Dua Lipa deri më tani është cilësuar si pop ylli në ngritje.

Muzika e saj tashmë po pëlqehet shumë ku këngëtarja po prek nga afër shijen e suksesit, pas hiteve të fundit, si “Be the One”, “Last Dance” “Hotter then Hell”, duke fituar kështu vendet e para në shumë klasifikime muzikore në Evropë.

Dua Lipa është vajza e këngëtarit të rokut Dukagjin Lipa, i cili është pjesë e grupit të njohur, “Oda”.

© KOHA. Të gjitha të drejtat janë të rezervuara.