I pret veshët, se flet me të tjerët

2 Shkurt 2017 - 11:38      

E mbani mend Zarinën, vajzën nga Afganistani, e cila ishte martuar në moshën 13-vjeçare? Burri i saj, e ka dhunuar dhe i ka prerë veshët sepse e akuzonte se fliste me njerëz të tjerë.

Ata ishin duke fjetur në dhomën e tyre të gjumit, kur ai zgjoi vajzën e mitur, me të cilën ishte martuar, e lidhi dhe e gjymtoi, transmeton TCh. Policia e Afganistanit e ka shpallur në kërkim atë, për dhunë dhe gjymtim të gruas së tij.

“Nuk kam bërë asnjë mëkat. Nuk e di pse ma bëri këtë. Ai është njeri shumë i çuditshëm dhe shpesh më akuzonte se bisedoja me njerëz të ndryshëm, kur shkoja për të takuar prindërit e mi”, tha 13-vjeçarja.

Rasti i Zarinës nuk është rast i izoluar në Afganistan, por është një fenomen shumë shqetësues.

Politikanët atje janë përpjekur në mënyrë të vazhdueshme që të vonojnë apo kthejnë mbrapsh ligjet dhe amendamentet ligjore që do të mbronin femrat nga abuzimi.