Pesë gola “shqiptarë” në Superligën e Zvicrës

13 Shkurt 2017 - 11:50      

Sulmuesi Albian Ajeti ia ka siguruar fitoren skuadrës së tij St. Gallen që e mposhti Lausannen me rezultatin 2:1. Ajeti golin e fitores e shënoi në minutën e 70-të. Ndeshja ndërmjet këtyre dy skuadrave u zhvillua të dielën, në kuadër të xhiros së 20-të të Superligës së Zvicrës.

Për Lausannen golin e vetëm e shënoi mbrojtësi i përfaqësueses së Kosovës, Benjamin Kololli, në minutën e 57-të, shkruan sot “Koha Ditore”.

Për Ajetin 19-vjeçar ky ishte goli i shtatë në 14 paraqitje. Ka kontribuar edhe me një asistim, kurse për Kolollin 24-vjeçar ishte goli i katërt i shënuar në 12 paraqitje. Ai po ashtu ka edhe një asistim.

Ajeti e Kololli nuk ishin futbollistët e vetëm shqiptarë që këtë fundjavë kanë realizuar gola në ndeshjet e kampionatit të Zvicrës. Në katër prej pesë ndeshjeve të xhiros, futbollistët shqiptarë lanë gjurmën e tyre - me gol.

"Edhe njëherë St. Gallen fiton ndeshjen falë Albian Ajetit. Ajeti zakonisht është lojtar shumë i rëndësishëm për ekipin. Është një lojtar i palodhshëm që gjithmonë provon t'i shfrytëzojë gabimet e ekipeve kundërshtare", shkruan "fm1today.ch". Ajeti u vlerësua me notën pesë.

Të dielën gol shënoi edhe mesfushori i përfaqësueses së Kosovës, Hekuran Kryeziu. Kryeziu 24-vjeçar shënoi në fitoren që skuadra e tij Luzern e arriti ndaj Young Boys me rezultatin 4:1. Kryeziu shënoi golin e dytë në minutën e 31-të... (më gjerësisht lexoni sot në “Koha Ditore”)

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.