Goli kërkon fitore edhe ndaj Danimarkës

31 Janar 2017 - 20:04      

Fadil Goli, golashënuesi i Kosovës në fitoren 3 me 1 ndaj Qipros, ka deklaruar se kjo fitore ishte më e vështirë se ajo ndaj Norvegjisë në ndeshjen hapëse të kualifikimeve për Kampionatin Evropian në futsall 2018.

Kosova nisi ndeshjen më dobët duke pësuar e para gol, por arriti të kthehej deri në fund me dy gola të shpejtë në pjesën e parë, e me një tjetër në pjesën e dytë.

Në fazën e ardhshme Kosova kualifikohet edhe me një barazim nga ndeshja me Danimarkën që zhvillohet të enjten, por Goli thotë se Kosova hyn vetëm për fitore.

“Kundërshtari ishte më i fortë se Norvegjia. Në fillim patëm pak vështirësi, pasi kundërshtari bënte presion të vazhdueshëm, por falë shpirtit luftarak arritëm të fitojmë këtë ndeshje që ishte më e rëndësishmja në këtë fazë. Tash mbas dy ditëve na pret loja me Danimarkën ku edhe me një barazim kualifikohemi, por ne hyjmë për fitore”, ka thënë ai për Koha.net.

© KOHA. Të gjitha të drejtat janë të rezervuara.