Kosova U-17 humb minimalisht në miqësoren ndaj Greqisë

17 Janar 2017 - 13:33      

Përfaqësuesja e Kosovës U-17 në futboll e ka zhvilluar sot ndeshjen e dytë në Izmir në kuadër të turneut “Mercedes Benz Aegean Cup”, por këtë herë ajo ka qenë miqësore, bën të ditur FFK.

Përballë djelmoshave të Besnik Kollarit ishte Greqia, e cila bën pjesë në Grupin B, transmeton Koha.net.

“Pas një ndeshje shumë të barabartë fitores iu gëzuan grekët, me rezultat 1:0, falë një penalltie të dyshimtë të akorduar nga gjyqtari turk. Në ndeshjen e sotme Kosova pati një paraqitje dinjitoze, ku gjatë tërë kohës u tregua rival i barabartë i Greqisë, madje në disa raste periudha të lojës ishte dukshëm më e rrezikshme se kundërshtari”, thotë FFK përmes faqes zyrtare.

Më tutje thuhet se, “në pjesën e parë mundësinë më të mirë për të shënuar e pati Bajrush Osmani, në minutën e 20-të, por gjuajtja e tij nga brendësia e zonës u bllokua nga mbrojtja greke”.

Greqia shënoi golin e epërsisë në minutën e 52-të nga penalltia nëpërmjet Georgis Vrakas, pasi gjyqtari e vlerësoi të palejueshme një ndërhyrje për top të Altin Lutollit.

Pas këtij goli djelmoshat e Kollarit nuk u thyen moralisht dhe vazhduan me përpikëri t’i zbatonin detyrat e trajnerëve, duke organizuar aksione mjaft të mira, por që fati u mungoi në finalizim.

Në minutën e 60-të, gjuajtja e Edin Huseinit kaloi pranë portës, derisa në minutën e 80-të Qëndrim Zyba ishte dhe më afërt golit, por gjuajtja e tij edhe pse e kaloi edhe portierin grek, në fund përfundoi përskaj shtyllës.

Ndeshjen e radhës Kosova e zhvillon, të enjten, për pikë në kuadër të Grupit A kundër Sllovakisë.

Pjesë e Kosovës U-17 janë: Shaban Kuquku, Adonis Sopa, Leard Sadriu, Besnik Koci, Gent Musa, Altin Lutolli, Dardan Shabanhaxhaj, Bajrush Osmani, Adonis Aliu, Albin Prapashtica, Qëndrim Zyba. Luajtën edhe: Edin Huseini, Valon Zumberi, Deniz Sadiku, Armend Gashi, Blend Morina.

© KOHA. Të gjitha të drejtat janë të rezervuara.