Hajvalia vërshohet nga të rinjtë

9 Janar 2017 - 10:16      

Trajneri i Hajvalisë, Emin Bajrami, ka thënë se interesimi i lojtarëve të rinj për të qenë pjesë e skuadrës së tij është shumë i madh.

Ai ka thënë se numri i lojtarëve në stërvitjen e parë të vitit pritet të jetë rreth 40. Hajvalia të hënën (sot) do t'i nisë përgatitjet, por me pak shpresë për mbijetesë në elitën e futbollit kosovar.

Futbollistët që do të mbeten pjesë e Hajvalisë për pranverë, siç thotë Bajrami, nuk do të kenë paga.

"Më habit fakti se më shumë ka kërkesa tash për të qenë pjesë e Hajvalisë se që kishte kur luftonim për titull. Në pranverë do të hyjmë me një ekip të formuar nga lojtarë të rinj, por do të mundohemi të tregojmë cilësitë që kemi. Lojtarë të rinj nga Prishtina, Drita, Llapi, Gjilani, Vushtrria, 2 Korriku dhe skuadra e tjera kanë shprehur interesim të na bashkohen. Afërsisht 40 lojtarë do të jenë në ditët e para të përgatitjeve. Kryesia ka marrë vendim që në shumicën e ndeshjeve t'u ofrojë premia lojtarëve. Paga nuk do të ketë", ka thënë Bajrami të dielën për gazetën Koha Ditore.

Hajvalia pjesën vjeshtore e mbylli në vendin e fundit me shtatë pikë, pesë më pak se Trepça që është e parafundit (11). Nga Hajvalia, në mungesë të mjeteve financiare janë larguar shumë futbollistë që bartën barrën kryesore në pjesën vjeshtore.

© KOHA. Të gjitha të drejtat janë të rezervuara.