Çka pret Bunjaki nga ndeshja me Turqinë

10 Nëntor 2016 - 23:45      

Përzgjedhësi i Kosovës, Albert Bunjaki, ka deklaruar se pret përballje të vështirë me Turqinë në xhiron e katërt të Grupit I në Kualifikimet për “Rusia 2018”.

Turqia e Kosova luajnë të shtunën prej orës 18:00, ndërsa Bunjaki pret që Kosova të tregojë forcën e vet, edhe pse akoma thotë se është në fazën e koordinimit.

Bunjaki ka deklaruar për Interaktiv në KTV se Kosova ka treguar se di të luajë lojë ofensive, por thotë se si synim për ndeshje ka që të mos pësojë në 30 minutat e parë.

“Përderisa Turqia ishte në Euro 2016 ne po përgatitemi të lidhemi si ekip. Kemi treguar se kemi kapacitet të lojës ofensive, por akoma jemi në fazën e përgatitjeve, të koordinimit. Koha flet për të ardhmen e Kosovës. Do të jetë ndeshje e vështirë, sidomos në Turqi. 30 minutat e parë nuk duhet të pranojmë kurrsesi gol që ta kemi më lehtë për më vonë”, ka thënë Bunjaki.

Ai po ashtu ka konfirmuar se Donis Avdijaj i është bashkuar ekipit të Kosovës dhe se të gjithë lojtarët janë mirë me shëndet dhe të gatshëm për lojë. Bunjaki shpreson që formën e lartë që kanë lojtarët me klube ta paraqesin edhe në ndeshjen me Turqinë.

© KOHA. Të gjitha të drejtat janë të rezervuara.