Plisat lejojnë Hajrizin të luajë për Prishtinën

27 Tetor 2016 - 10:56      

Grupi i tifozëve “Plisat” janë pajtuar që Drilon Hajrizi të luajë për kampionin e Kosovës, Sigal Prishtinën.

Klubi nga kryeqyteti ka konfirmuar se Plisat kanë lejuar Hajrizin për shkak të krizës që po kalon Prishtina në ligë dhe në garat ndërkombëtare.

“Pas disa veprimeve të pamatura mirë të disa individëve brenda bordit dhe kryesisë tonë, Sigal Prishtina e ka filluar këtë sezon me disa probleme e mbi të gjitha me rezultate jo të mira”, thuhet në njoftimin e Prishtinës.

“Me qëllim që të tejkalohet kjo situatë, ne kemi kërkuar zgjidhje dhe konsiderojmë se e njejta është arritur me mirëkuptimin e qytetarëve dhe tifozëve tane. Ne falënderojmë Plisat që edhe pas gabimeve tona gjeten forcën dhe kurajën të na falin ato dhe për hirë të mbarëvajtjes së këtij kampionati dhe zgjidhjes së lëmshit të krijuar, ofruan zgjidhje duke e lejuar Drilon Hajrizin që të luajë për klubin tonë. Se Prishtina është një familje e madhe dhe se Plisat gjithmonë janë treguar të gatshëm të sakrifikohen për të, e dëshmon edhe kjo gatishmëri e tyre që të ndihmojnë klubin në këto momente jo të mira me të cilat po përballemi”, thuhej më tej.

“Jemi të vetëdijshëm që këtë vendim të vështirë, Plisat e kanë marrë duke u udhëhequr nga dashuria për Klubin, prandaj përgjegjësinë për gabimin dhe situatën e krijuar e ka marrë klubi dhe individët brenda tij”.

© KOHA. Të gjitha të drejtat janë të rezervuara.