Shqiptari që solli golfin në Shqipëri [video]

7 Tetor 2016 - 12:16      

Rënia e komunizmit në Shqipëri ka bërë që shumë shqiptarë të marrin rrugën e mërgimit në vende të ndryshme të botës.

Jo vetëm ajo kohë, por edhe sot, shumë të rinj marrin rrugën drejt vendeve të tjera në botë për një jetë më të mirë. Diaspora shqiptare konsiderohet mjaft e madhe edhe në Itali, ku edhe integrimi i tyre ka marrë përmasa tjera, përkundër sfidave me të cilat ballafaqohen, raporton KTV.

Hazis Allkja ka shumë vite që jeton në Itali, ka filluar të merret me një sport i cili nuk është pothuajse fare i pranishëm në vendin tonë. Bëhet fjalë për sportin e golfit, me të cilin ka filluar të merret rastësisht.
Natyrisht që fillimi nuk ka qenë aspak i lehtë, por tani Allkja është mjaft i suksesshëm dhe mbron ngjyrat e Shqipërisë në turnetë dhe garat ndërkombëtare.

Ai ka qenë iniciator i themelimit të Federatës Shqiptare të Golfit dhe synon të ketë aktivitete sa më shumë, në mënyrë që edhe te shqiptarët të popullarizohet ky sport.

Që nga themelimi i saj, kombëtarja e golfit po bën një prezantim shumë të mirë në aktivitetet ndërkombëtare, duke treguar aftësitë e lojtarëve të trajnuar në Evropë dhe kryesisht në Itali.

Kosova tash e sa vite ka një fushë të Minigolfit, e cila i plotëson standardet e një fushe, mirëpo me golf nuk është se ka shënuar ndonjë hap të mbarë.

Ky sport elitar duhet të përhapet më shumë në vendin tonë, duke ua krijuar brezave të rinj mundësinë për të mësuar rreth tij.

© KOHA. Të gjitha të drejtat janë të rezervuara.