“Dardanët” i fishkëllyen Kadri Veselit [video]

7 Tetor 2016 - 09:43      

“Dardanët”, tifozët e Përfaqësueses së Kosovës, mbrëmë në Shkodër i fishkëllyen kryetarit të Kuvendit të Kosovës, Kadri Veseli, transmeton koha.net.

Fishkëllimat dhe klithjet “Kadri – Kadri” nga “Dardanët” u bënë derisa Veseli po bënte selfie pas humbjes së thellë të Kosovës me Kroacinë (6: 0), transmeton koha.net.

Gjithë këtë “veprimtari “ të kryekuvendarit, “Dardanët” e përcollën me këtë “protestë” të shkurtër publike.
E Veseli iku nga ata dhe nga stadiumi duke buzëqeshur.
Ndoshta Kadri Veseli pati arsye të buzëqeshte pak dhe sidomos ta fshehte buzëqeshjen.

Sepse, pas disfatës Kosova nuk e ka aq të sigurt kualifikimin, dhe Veseli nuk ka nevojë ta përmbushë premtimin e vet për t’i shpërblyer lojtarët e Përfaqësueses së Kosovës me nga 100 mijë euro.

Jo pse ai nuk do të donte ta bënte këtë, por për shkak se dihet se ai buxhetin e vet, të Kuvendit,e ka të limituar dhe me atë buxhet nuk parashihet shpërblimi i futbollistëve. Veç kësaj, Kuvendit buxhetin ia cakton Qeveria, e cila edhe është kompetente për të marrë e për të shpërndarë para.

Në Kosovë shpeshherë ose përzihen ose merren kompetenca kush si të mundet edhe pse nuk i ka.

© KOHA. Të gjitha të drejtat janë të rezervuara.