Franca i rihap dyert Benzemas

6 Tetor 2016 - 15:19      

Federata Franceze e Futbollit po mendon t'i japë një tjetër mundësi Benzemas për të luajtur me skuadrën përfaqësuese. Është vetë presidenti i qeverisë së futbollit francez, Noel Le Graet, ai që ia ka hapur dyert e Francës sulmuesit të Realit të Madridit nëpërmjet një interviste të dhënë për të përditshmen “L'Equipe”.

“Benzema mund të grumbullohet në kombëtare. Nuk më pëlqen që t'i ndëshkoj përjetë njerëzit. Hetimet për çështjen ku ai është i përfshirë po vazhdojnë edhe pse unë mendoj se ato po zgjaten pak, por drejtësia është e tillë. Lojtari nuk ka qenë asnjëherë problem për kombëtaren dhe Deschamps e ka mbrojtur gjithmonë dhe kur nuk ka pasur rezultate të larta”, u shpreh ai, transmeton TCH.

Ndërkaq, trajneri Deschamps përpara dy ditësh bëri një deklaratë që la përshtypjen se ai nuk dëshironte që ta kthente Benzemanë në përfaqësuese.

“Nuk pres asgjë nga Benzema apo futbollistët e tjerë. Përzgjedhjet e lojtarëve nuk i bëj në bazë të asaj që thonë lojtarët në intervista apo të artikujve që shkruhen në gazeta për ta”, u shpreh trajneri i “gjelave”.