Portieri kroat: Do të analizojmë mirë Kosovën dhe të marrim tri pikë

4 Tetor 2016 - 18:26      

Portieri i Kroacisë, Danijel Subashiq, thotë se përfaqësuesja kroate nuk di asgjë për lojën e Kosovës, por do të luajë me përkushtim të madh që të arrijë trepikëshin e parë në rrugën për “Rusia 2018”.

Kosova dhe Kroacia luajnë të enjten në Shkodër në xhiron e dytë të Grupit I kualifikues.

Tre ditë para ndeshjes, kroatët kanë mbajtur një konferencë për media, në të cilën portieri i Monacos ka deklaruar se ekipi kroat nuk e njeh fare Kosovën, por do të përpiqet që për pak ditë të analizojë përfaqësuesen kosovare. Ai ka shtuar se pavarësisht mungesës së Luka Modriqit, Ivan Rakitiqit, Dejan Lovrenit dhe Marco Pjacas, Kroacia do të luftojë vetëm për fitore.

“Kosova për ne është e panjohur, por do të bëjmë video-analiza dhe ajo do të na tregojë se çfarë duhet të bëjmë. Kryesorja është të jemi të përqendruar, të mençur dhe të hyjmë me 100 për qind që nga fillimi dhe të marrim të tri pikët”, ka thënë gardiani kroat.

© KOHA. Të gjitha të drejtat janë të rezervuara.