Lëndimet po shndërrohen në kundërshtarë të mëdhenj të Kosovës

26 Shtator 2016 - 08:19      

Mesfushori i krahut, Milot Rashica, ka pësuar një lëndim në ndeshjen që skuadra e tij Vitesse e humbi të dielën nga Twente me shifrat 2:1. Ai u detyrua të lërë fushën e lojës në minutën e 27-të për shkak të një lëndimi në këmbën e djathtë. Të dielën nuk është mësuar se sa është serioz lëndimi i yllit të Kosovës dhe sa pritet të mungojë ai.

Mungesën eventuale të Rashicës për kohë pak më të gjatë do ta ndiente shumë edhe Përfaqësuesja e Kosovës në futboll, që në pjesën e parë të muajit tjetër i luan dy ndeshje eliminatore për kampionatin botëror "Rusia 2018", shkruan Koha Ditore.

Edhe nëse Rashica do të jetë i gatshëm për dy ndeshjet e Kosovës, përzgjedhësi Albert Bunjaki do të ketë mjaft telashe me lëndime të lojtarëve. Ai tashmë e di se nuk do të mundë të llogarisë në shërbimet e Elbasan Rashanit, Benjamin Kolollit dhe Loret Sadikut.

Kosova më 6 tetor në Shkodër e pret Kroacinë, ndërsa tri ditë më vonë në Poloni përballet me Ukrainën. Në dyshim serioz për këto dy ndeshje është edhe mesfushori Enis Alushi, që është lider në mesfushën kosovare... (më gjerësisht lexoni sot në “Koha Ditore”)

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.