Chishkala, rusi i akullt i futsallit

22 Shtator 2016 - 13:30      

Shumë lojtarë do të reagonin si të çmendur nga gëzimi pas golit të parë të shënuar në Kampionatin Botëror në futsall, në veçanti ata deri në moshën 21 vjeçe. Festa do të mund të ishte e egër, duke puthur logon e fanellës apo duke kërkuar kamerën për t'ia dedikuar golin të dashurve të tij, shkruan sot Koha Ditore.

Por, i tillë nuk është edhe Ivan Chishkala.

"Unë jam shumë i qetë dhe aspak nuk jam emocional", tha Chishkala që kontribuoi me gol në fitoren e Rusisë me rezultatin 7:1 ndaj Kubës. "Nuk ndjeva diçka të veçantë, pasi ishte vetëm një gol sikur të gjithë të tjerët. Për mua është më e rëndësishme që kemi tubuar nëntë pikë dhe kemi kaluar me sukses fazën e nokautit".

Chishkala njihet si lojtar i akullt, pasi vjen nga Norilsku i Siberisë, qyteti më i ftohtë që gjendet brenda rrethit Arktik. Ky vend është i zhytur në errësirë të plotë për 45 ditë brenda një viti dhe temperaturat arrijnë deri në -50 gradë celsius. Por, me gjithë acarin e madh, Chishkala me sukses është marrë me një sport, i cili e ka dërguar në nxehtësinë e Kolumbisë, vend ky ku po mbahet botërori i futsallit.

"Atje është acar shumë i madh", thotë Chishkala, teksa përshkruan vendlindjen e tij. "Me shtatë vjet jam regjistruar në shkollë të futsallit dhe në moshën 14-vjeçare jam transferuar në Moskë dhe kam filluar të luaj për Dinamon ku kam rënë në sy të përzgjedhësve. Pasi përfaqësova me sukses ekipin U-20, u promovova në ekipin e parë dhe ja ku jam"...(Më gjerësisht lexoni sot në Koha Ditore).

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.