Kosova dhe Hungaria – bashkëpunim në fushën e sportit

14 Shtator 2016 - 15:48      

Ministri i Kulturës, Rinisë dhe Sportit, Kujtim Shala, ka pritur sot një delegacion të Hungarisë, në përbërje të Balint Tombor dhe Adam Szucs, këshilltarë politikë në Ministrinë e Punëve të Jashtme dhe të Tregtisë, Laszlo Markusz, ambasador i Hungarisë në Kosovë dhe Tamas Gerelu, atashe për tregti.

Përmes një komunikate për media bëhet e ditur se në këtë takim është biseduar për një varg çështjesh të interesit të përbashkët, me një theks të veçantë për bashkëpunimin konkret ndërmjet institucioneve të Kosovës dhe atyre të Hungarisë në fushën e sportit, me ç’rast u tha se Kosova mund të përfitojë nga përvojat hungareze të sportit.

“Delegacioni hungarez u shpreh i gatshëm që të fillojë bashkëpunimin konkret me institucionet e sportit të Kosovës dhe të ndihmojë futbollin e Kosovës, duke i përkrahur futbollistët, trajnerët dhe gjyqtarët e Kosovës. Po ashtu, ndërmjet ministrit Shala dhe delegacionit hungarez u bisedua për investime kapitale që po realizon Kosova për përmirësimin e infrastrukturës sportive në vend”, thuhet në komunikatë.

Më tutje thuhet se delegacioni hungarez, nga ana e tij, shprehu interesimin e Qeverisë së Hungarisë për këtë çështje, dhe për këtë arsye ministri Shala është ftuar që në fillim të tetorit të vizitojë Hungarinë dhe të shqyrtojë mundësitë konkrete për bashkëpunim të mëtutjeshëm në këtë drejtim.

© KOHA. Të gjitha të drejtat janë të rezervuara.