Bogujevcit, ndihmë e përhershme financiare me nga 500 euro në muaj

9 Shtator 2016 - 16:09      

Ministri Kujtim Shala i ka ndarë vendimin për mbështetje të përhershme financiare ish-boksierit Mehmet Bogujevci, i cili do të përfitojë nga 500 euro në muaj.

Këtë vendim, Shala e ka marrë në bazë të Rregullores nr. 14/2013 për Mbështetje të Përhershme Financiare të Sportistëve.

Sportisti Bogujevci, si fitues i Medaljes së Argjendtë në Kampionatin Botëror të organizuar më 1978-ën në Beograd, është shpallur si kandidati përfitues i mbështetjes së përhershme financiare, e cila do të realizohet çdo muaj të vitit kalendarik në mënyrë retroaktive nga data 1 korrik 2016.

Vendimi është marrë nga Ministri i MKRS-së, pas shqyrtimit të kërkesës dhe dokumentacionit të bashkëngjitur që ka ardhur nga Federata e Boksit e Kosovës.

Shala e ka uruar ish-boksierin Bogujevci për përkrahjen që do ta merr nga ana e MKRS-së. Ai u shpreh se kjo përkrahje nga shteti vjen si dëshmi dhe njohje e meritave të sportistëve që kanë lënë gjurmë me sukseset e tyre dhe është një inkurajim për sportistët e rinj që të ngritin cilësinë e tyre drejt sukseseve të mëdha.

Ndërkaq, Bogujevci, e falënderoi ministrin Shala për përkrahjen që i ka ofruar MKRS-ja, duke thënë se kjo është një mirënjohje e kontributit që ai dhe gjenerata e tij kanë dhënë për boksin dhe për sportin në përgjithësi.

© KOHA. Të gjitha të drejtat janë të rezervuara.