Berisha: Vështirë do ta kemi ndaj Bullgarisë

7 Shtator 2016 - 11:19      

Basketbollisti i përfaqësueses së Kosovës në Basketboll, Dardan Berisha, ka thënë se dueli me Bullgarinë në kuadër të kualifikimeve për Evropian, do të jetë i vështirë.

Bullgarët, sipas tij, do të mundohen të na vështirësojnë gjërat, pasi edhe ata janë në të njëjtën pozicion sikur ne, “pra kanë pësuar dy humbje dhe do të kërkojnë ta shfrytëzojnë përparësinë e terrenit nikoqir për të na mposhtur”.

“Mirëpo ne do të hyjmë në parket për të bërë më të mirën dhe për të nxjerr rezultat pozitiv, sepse jemi të vetëdijshëm për rëndësinë e kësaj ndeshje. Kundër Ukrainës luajtëm mirë, por do të kërkojmë të përmirësohemi edhe më shumë nga ndeshja në ndeshje”, u shpreh Berisha, raporton Koha.net.

Përfaqësuesja e Kosovës në Basketboll sot zhvillon ndeshjen e tretë në këto kualifikime kundër Bullgarisë me fillim nga ora 17:00 në Bullgari.  

© KOHA. Të gjitha të drejtat janë të rezervuara.