Veseli premton premi për lojtarët nëse Kosova kualifikohet për “Rusia 2018”

6 Shtator 2016 - 20:32      

Kryetari i Kuvendit të Kosovës, Kadri Veseli, ka premtuar se secili lojtarë i përfaqësueses së Kosovës në futboll do të marrë një shpërblim prej 100 mijë euro, në rast se arrijnë të kualifikohen në Kupën e Botës "Rusia 2018".

Një premtim të tillë kryeparlamentari Veseli e dha në pritjen e ekspeditës së Përfaqësueses së Kosovës pas kthimit nga Finlanda.

Paraqitja mbresëlënëse e futbollistëve të Kosovës në ndeshjen kundër Finlandës, që u mbyll me barazim 1:1, e që ra edhe në sy të mediave dhe ekspertëve të huaj, duke marrë përgëzime për cilësinë e treguar, ka sjellë efektet e para pozitive edhe në vendin tonë. Në fakt, secili lojtar i Përfaqësueses së Kosovës, do të marrë nga 100 mijë euro shpërblim, nëse arrijnë ta kualifikojnë ekipin e vendit tonë në Botërorin që do të mbahet në Moskë.

Premtimi është bërë nga kryetari i Kuvendit të Kosovës, njëherësh kryetar i Partisë Demokratike të Kosovës, Kadri Veseli. Ai e ka quajtur ekipin e Kosovës "Brazili i Vogël".

“Nga 100 mijë euro premtoj për secilin lojtar nëse arrijnë të kualifikohen, gjë të cilën unë e besoj se do të ndodhë. Loja e djeshme dëshmoi se nuk jemi inferiorë ndaj asnjë ekipi. Urime djelmoshave dhe gjithë vendit”, tha Kryetari i Kuvendit të Kosovës, Kadri Veseli.

Edhe kryetari i Federatës së Kosovës, Fadil Vokrri tha se kanë marrë përgëzime nga figurat më të mëdha të organizatave botërore si UEFA dhe FIFA.