Vokrri: Yjtë shqiptarë të Zvicrës nuk janë tradhtarë, ata janë yjet tanë

30 Gusht 2016 - 00:06      

Fadil Vokrri, kryetar i Federatës së Futbollit të Kosovës, ka kërkuar që të ndalen thirrjet që po bëhen se futbollistët që nuk do të vijnë të luajnë për Kosovën janë tradhtarë.

Sipas tij, kontributi i madh i tyre në të shkuarën nuk duhet harruar dhe se pavarësisht vendimit se ku do të luajnë, ata nuk e meritojnë të quhen tradhtarë.

Megjithatë, Vokrri, në një bisedë për Interaktiv të KTV-së, shton se tani Kosova është në moment tjetër dhe futbollistët duhet të marrin përgjegjësitë e tyre.

“Ata nuk janë tradhtarë. Mos ta bëjmë temë të gjerë, ku po flasin edhe njerëz që nuk janë të sportit, por i kemi marrë si të tilla. Pavarësisht vendimit që do të marrin, ata janë lojtarë tanë dhe do t’i konsiderojmë si të tillë. Kanë kontribuar me publicitet që nuk duhet harruar. Por ky është moment krejt tjetër dhe secili duhet të marrë përgjegjësitë në kohë të caktuara”, ka thënë Vokrri në Interaktiv.

© KOHA. Të gjitha të drejtat janë të rezervuara.