Feniksi arrin në Andorra

16 Gusht 2016 - 16:58      

Skuadra kampione e Kosovës në futsal, Feniksi nga Drenasi, ka mbërritur në Andorra, aty ku në kuadër të Grupit H të mërkurën, do ta zhvillojë ndeshjen e parë kualifikuese për në Ligën e Kampionëve.

Me fillim nga ora 18:00, Feniksi do të përballet me ekipin nga Anglia, Oxford City Lions.

Kampioni i Kosovës tashmë i ka kryer të gjitha përgatitjet për një paraqitje sa më dinjitoze të Kosovës në këtë garë ndërkombëtare, ndërsa në radhët e veta ka transferuar lojtarë të njohur vendorë dhe ndërkombëtarë.

Nga vendi vetëm për kualifikime, ekipit të Feniksit i është bashkuar Ramadan Alaj, lojtar i ekipit nënkampion të Kosovës, Liburnit. Pjesë e ekipit është edhe Azem Ibrahimi, që vjen nga klubi çek, Benago.

Ndërkohë, nga arena ndërkombëtare janë transferuar portieri Cristiano, pastaj lojtar të tjerë kualitativë si Marcel Rodek, Michal Belej dhe Marcelo Reis.

Ndryshime janë bërë edhe në drejtimin e ekipit, ku timonier do të jetë Beni Simitciu, trajner i ekipit të Benagos në Çeki, i cili njëherësh është i licencuar edhe me licencë të UEFA-s e FIFA-s.

© KOHA. Të gjitha të drejtat janë të rezervuara.