FFK uron Mjalindën, kërkon që edhe sportistët e tjerë ta nderojnë ashtu Kosovën

9 Gusht 2016 - 16:09      

Federata e Futbollit të Kosovës përmes një komunikate për media ka uruar xhudisten Majlinda Kelmendi për suksesin e arritur në ‘Rio 2016’, ndërsa ka thënë se edhe sportistët e tjerë duhet ta nderojnë në të njëjtën mënyrë ngjyrat e Kosovës.

“Majlinda ka punuar me përkushtim dhe dinjitet, duke lënë interesat e veta personale për të mbrojtur ngjyrat e Kosovës, duke treguar shembull të pashoq, të cilin shembull duhet të ndjekin të gjithë sportistët që duan të nderojnë dhe të mbrojnë ngjyrat e Kosovës”, thotë FFK.

FFK më tutje gjithashtu ka uruar edhe Komitetin Olimpik dhe Federatën e Xhudos, transmeton Koha.net.

Në mbledhjen e mbajtur sot KE e FFK-së shqyrtoi dhe miratoi edhe projektet që do të përkrahen nga UEFA për kompleksin sportivë të FFK-së si dhe ndihmën për të gjitha klubet e futbollit. Po ashtu KE, thuhet në komunikatë, shqyrtoi dhe miratoi edhe raportin e punës të Qendrës Edukative të Trajnerëve, ku 76 trajnerë kanë marrë Licencën për trajnerë fillestarë dhe “B” si dhe raportin e Komisionit të Gjyqtarëve për normat fizike të mbajtura fundjavën e kaluar.

“Nga 202 gjyqtarë 165 iu nënshtruan normave fizike e ku të suksesshme ishin 145 dhe 20 gjyqtarë nuk arritën të kalojnë normat, të cilët do të riprovohen më vonë”, thotë FFK.

© KOHA. Të gjitha të drejtat janë të rezervuara.