Kroatët: Kosova u barazua me Serbinë me medalje të arta olimpike

8 Gusht 2016 - 14:02      

Fitorja e Majlinda Kelmendit në Rio, duke u stolisur me hiç më pak se medaljen e artë në xhudo, është komentuar gjerë e gjatë ne mediume në mbarë botën.

Veç atyre mediumeve të mëdha botërore, si CNN, BBC e të tjera, kanë komentuar edhe fqinjët këtë ngjarje, si Serbia e Kroacia.

Kjo e fundit, përmes mediumit Indeks.hr, madje ka ngacmuar Serbinë duke ia bërë me dije se tani Kosova, e cila mori për herë të parë pjesë në një Olimpiadë, u barazua me Serbinë për sa u përket medaljeve të arta.

E kjo i ka hidhëruar mediat serbe. Telegraf.rs thotë kështu: Fqinjëve nuk iu desh edhe shumë kohë që të ngrihen e të komentojnë për medaljen e artë të fituar nga Majlinda Kelmendi nga shteti i vetëshpallur i Kosovës.

“Ajo që serbëve do t’u pengojë në veçanti është se, Kosova, të cilën ata e quajnë “të vetëshpallur” e “shtet i vetëquajtur”, qysh në Lojërat e para Olimpike që merr pjesë, me fitoren e Majlinda Kelmendit, është barazuar me medalje të arta olimpike me Serbinë, shtet me histori e traditë të madhe sportive”, është një pjesë e tekstit të shkruar nga Indeks.hr e që është shkëputur nga Telegraf.rs, përmes së cilit e kritikon mediumin kroat se nuk e ka përmendur se kur Serbia ka garuar e vetme e kur me republikat tjera ish-jugosllave.

Telegraf.rs kujton se medalja e parë e artë e Serbisë është fituar më 2008 në Londër nga Milica Mandiq në sportin e taekwondos. 

© KOHA. Të gjitha të drejtat janë të rezervuara.