Ndriçimi, prioritet në stadiumin olimpik “Adem Jashari”

29 Korrik 2016 - 10:51      

Drejtori i Departamentit të Sportit në MKRS, Iber Alaj, së bashku me përfaqësues të Federatës së Futbollit të Kosovës dhe të Federatës së Futbollit të Shqipërisë kanë qëndruar të enjten në Mitrovicë, me ç’rast u takuan me përfaqësues komunalë për të biseduar për ecurinë e projekteve që kanë të bëjnë me përgatitjen e stadiumit “Adem Jashari” për zhvillimin e ndeshjeve ndërkombëtare.

Përmes një komunikate bëhet e ditur se prioritet në investimet në stadiumin “Adem Jashari” do të jetë ndriçimi, transmeton kOha.net.

Ndërsa nënkryetari i komunës së Mitrovicës, Safet Kamberi, i shoqëruar nga drejtori i DKRS -së, Tafil Peci, ka falënderuar Ministrinë e Kulturës, Rinisë dhe Sportit për mbështetje e tyre maksimale në përmirësimin e cilësisë së infrastrukturës sportive, e cila do t’i motivojë të rinjtë sportistë të cilët po ndihmojnë në konsolidimin e identitetit ndërkombëtar të shtetësisë së Kosovës.

Të dy palët u shprehën të gatshëm që bashkërisht të punojnë në mënyrë që stadiumi olimpik “Adem Jashari” sa më parë të jetë i gatshëm për zhvillimin e ndeshjeve të përfaqësueses së Kosovës me kushtet e kërkuara nga FIFA dhe UEFA.

© KOHA. Të gjitha të drejtat janë të rezervuara.