Komuna thërret deçanasit të përfitojnë nga falja e borxheve

15 Shkurt 2017 - 16:26      

Komuna e Deçanit të mërkurën u ka bërë thirrje publike qytetarëve të vet që të përfitojnë nga Ligji i ndryshuar dhe plotësuar për Faljen e Borxheve Publike, i cili ka rifilluar zbatimin e procedurave për faljen e borxhit të tatimit në pronë, në afatin e ri deri në muajin shtator të këtij viti, njofton Koha Ditore.

Komuna i ka ftuar qytetarët që të shfrytëzojnë këtë mundësi dhe të përfitojnë nga falja e borxheve, duke i kontaktuar zyrtarët në zyrën e tatimit në objektin e komunës së Deçanit. Qytetarët do kenë mundësinë që të njoftohen hollësisht për të gjitha procedurat e nënshkrimit të kontratave për faljen e borxheve.

Sipas zyrtarit në Drejtorinë e Financave, Agron Demukaj, qytetarët deçanas i kanë borxh komunës rreth 1 milion e 100 mijë euro tatime në pronë të papaguara.

© KOHA. Të gjitha të drejtat janë të rezervuara.