Mërgimtari pajisë me kompjuterë shkollën e Carrallukës së Malishevës

1 Shkurt 2017 - 11:02      

Malishevë, 1 shkurt - Mërgimtari nga Guncati i Malishevës, Bashkim Shala, i cili jeton në Zvicër, ka ndihmuar edhe një shkollë tjetër me kompjuterë, për lëndën e informatikës, përkatësisht ka pajisur kabinetin e informatikës në Sh.F.M.U. “Hilmi Hoti” në Carrallukë, me dhjetë kompjuterë.

Kohë më parë, mërgimtari Shala, kishte pajisur me kompjuterë edhe shkollën e fshatit Guncat, transmeton Koha.net.

Ky donacion është mirëpritur nga nxënësit, personeli arsimor dhe nga Drejtoria e Arsimit dhe Edukim në Komunën e Malishevës. Me rastin e dhurimit të kompjuterëve për shkollën “Hilmi Hoti”, drejtori i Drejtorisë për Arsim dhe Edukim në Malishevë, Avdi Morina, e ka falënderuar mërgimtarin Shala dhe e ka vlerësuar lartë kontributin e tij, për angazhim në krijimin e kushteve më të mira për nxënësit e Komunës së Malishevës, në procesin e mësimnxënies dhe edukimit.

Mërgimtari Bashkim Shala premtoi se “nuk do të jetë donacioni i fundit, por do të angazhohet në sigurimin e donacioneve tjera për shkollat e Komunës së Malishevës”.

© KOHA. Të gjitha të drejtat janë të rezervuara.