Mitrovicasit, skeptikë për rrënimin e murit

31 Janar 2017 - 15:06      

Rezoluta lidhur me ndërtimin e murit në mënyrë ilegale në pjesën veriore të Mitrovicës, që u votua nga Kuvendi i Kosovës, sot i jepte afatin e fundit autoriteteve përgjegjëse për largimin e murit të ndërtuar ilegalisht në veri të vendit. 74 deputetët e Kuvendit kanë votuar Pro rrënimit të murit në Mitrovicën veriore, dhe afati përfundimtarë ishte caktuar dita e fundit e janarit.

Ndërkohë që kanë mbetur edhe pak orë deri në përfundim të ditës së sotme, datë 31 janar, mitrovicasit shprehen skeptikë se një gjë e tillë do të ndodhë, raporton KP.

Sipas tyre, Prishtina zyrtare nuk ka fuqi për ta rrënuar murin, duke e quajtur si një veprim të rrezikshëm rrënimin e tij nga pala kosovare.

Nga ana tjetër, disa qytetarë të cilët u shprehën më të matur në deklarimet e tyre, thanë se muri nuk do të rrënohet, por vetëm të shkurtohet.

Riza Lushi, qytetar i Mitrovicës, tha se muri do të largohet një ditë siç janë larguar edhe barrikadat, por tani jo.

Ai shtoi se nuk beson në deklaratat e politikanëve kosovarë, ngase siç tha, çka do që kanë thënë deri tani, nuk e kanë realizuar.

Nazmi Januzi ka kritikuar klasën politike, duke thënë se ky mur me këta politikanë nuk do të rrënohet kurrë.

Edhe Bedri Shabani, një qytetar tjetër nga Mitrovica, u shpreh skeptik për rrënimin e murit.

Ai thotë se rrënimi i murit është veprim i rrezikshëm dhe ai mund të shkurtohet, por assesi të rrënohet.

Njëri nga qytetarët që nuk deshi të prezantohet, tha se murin mund ta largojnë vetëm serbët nëse duan.