Lladrovci ua ndërron pozitat 3 drejtorëve, emëron 5 femra në kabinet

31 Janar 2017 - 14:51      

Kryetari i komunës së Drenasit, Ramiz Lladrovci, ua ka ndërruar pozitat 3 drejtorëve të komunës.

Sadik Tahirajn, drejtorin e Arsimit tashmë e ka emëruar si Shef të Sektorit të Administratës në komunë, drejtorin e Kulturës Agron Dubovcin e ka emëruar Shef të Sektorit të Kulturës ndërsa drejtori i Bujqësisë Skënder Hasi ka kaluar në Drejtorinë e Financave si shef për buxhet, raportoj KTV.

Aktualisht drejtoria e Arsimit ka mbetur pa drejtor, është bërë e ditur në një konferencë për media.

E kryetari Lladrovci është shprehur se nuk ka pasur kurrfarë ankese ndaj ish-drejtorëve por e ka parë të nevojshëm pozicionimin e tyre në drejtori tjera në mënyrë që komuna të punojë me kapacitet më të madh.

Po ashtu Lladrovci ka prezantuar edhe kabinetin e tij, që në përbërje tash e tutje do të jenë 5 femra, ku tha se kjo është edhe përmbushja e premtimit të tij gjatë fushatës se do të ngritë rolin e femrës në komunë. 

© KOHA. Të gjitha të drejtat janë të rezervuara.