Malisheva kritikon Qeverinë për ndarje partiake të buxhetit [video]

30 Janar 2017 - 20:19      

Kanë hyrë në vitin e katërt të qeverisjes, por asnjë ndihmë shtesë nuk iu është ofruar nga Qeveria.

Komuna e Malishevës, e cila udhëhiqet nga partia e Fatmir Limajt, Nisma, asnjëherë nuk ka marrë ndonjë grand nga Qeveria, raporton KTV.

Menaxhuesit e financave në këtë komunë thonë se krejt ky injorim po bëhet vetëm pse i takojnë kësaj partie politike.

Vesel Krasniqi, Drejtor i Financave dhe Buxhetit në Komunë të Malishevës, ankohet se Ministria e Financave po bën shkelje të Ligjit për Buxhetin, pasi është vonuar në ndarjen e mjeteve buxhetore.

Sipas tij, për shkak të moszotimit të mjeteve, janë duke u vonuar mjaft shumë në zbatimin e planeve kapitale, si dhe rrezikojnë t’u shkyçet energjia elektrike për shkak të mospagesës për dy muaj radhazi.

Por në Ministrinë e Financave thonë krejt diçka tjetër.

Në një përgjigje të shkurtër me shkrim, kjo Ministri fajin e hedh te komuna pasi sipas tyre, plani për paratë rrjedhëse nuk është dorëzuar me kohë.

Por, drejtori i Financave në Malishevë thotë se plani për shpenzimet mujore ka qenë në rregull, për çka edhe kanë marrë konfirmimin pas dorëzimit të planit. 

© KOHA. Të gjitha të drejtat janë të rezervuara.