Rekrutimi në ndërmarrjen “Ambienti” në Ferizaj po shoqërohet me parregullsi [video]

28 Janar 2017 - 22:14      

Organizata joqeveritare “Iniciativa për Progres”, ka reaguar ndaj, siç thonë, parregullsive në konkursin për rekrutimin e punëtorëve në ndërmarrjen “Ambienti” në Ferizaj.

Ata thonë se kanë evidentuar shkelje në përzgjedhjen e personelit në tri pozita, atë të kryeshefit ekzekutiv, auditorit dhe zyrtarit kryesor financiar. Sipas tyre, megjithëse dy persona kanë pasur pikë të njëjta, në testin për pozitën e kryeshefit, komisioni ka zgjedhur Izet Rushitin, asamblist i AAK-së, parti që bashkëqeverisë me LDK-në në këtë komunë, raporton KTV.

Albulena Nrecaj thotë se një person tjetër ka qenë i pari edhe për pozitën e auditorin edhe atë të zyrtarit kryesor financiar, por pasi ai ka zgjedhur pozitën e auditorit, për pozitën e zyrtarit financiar, komisioni ka anashkaluar 5 persona, duke zgjedhur të shtatin në listë.

INPO, po ashtu, ka vërejtje për përpilimin e testit, ku sipas tyre, aplikuesve u është kërkuar t’u përgjigjen pyetjeve jorelevante me pozitën për të cilën kanë konkurruar Ata kanë përmendur, si shembull, se aplikuesve u është kërkuar të shkruajnë ese për stinën e dimrit ose pavarësinë e Kosovës.

Bordi i kësaj ndërmarrjeje mohon akuzat, thotë se informacionet e INPO-s janë gjysmake. ndërsa Opozita thotë se u shkel Ligji për Ndërmarrjet Publike. 

© KOHA. Të gjitha të drejtat janë të rezervuara.