Padit Komunën e Gjakovës për uzurpim të banesës derisa ishte në spital [video]

26 Janar 2017 - 21:49      

Një banor i Gjakovës ka paditur komunën, pasi pretendon se ia kanë uzurpuar banesën, në kohën sa ishte i shtrirë në spital.

Kishte qëndruar për rreth 20 ditë në QKUK, në marsin e vitit 2013, dhe kur ishte kthyer në Gjakovë, thotë se komuna ia kishte uzurpuar banesën ku jetonte, raporton KTV.

Sipas Ardian Sylës, banesa i është ndarë një personi tjetër, e që nga ajo periudhë thotë se mezi ia arrin të mbijetojë.

Për të kthyer në pronësi garsonierën në lagjen Blloku i Ri, që i ishte ndarë babait të tij në vitin 1987 nga atëherë Ndërmarrja Publike Banesore, Syla ka ngritur padi në Gjykatën Themelore të Gjakovës.

Ekipi i KTV-së nuk është lejuar të përcjellë seancën e zhvilluar për këtë rast.

Një gjë të tillë, sipas punëtorëve të sigurimit, e ka kërkuar gjyqtarja e rastit, Afijete Sada Gllogjani, e pas insistimit, administratori i gjykatës, Rudin Elezi, ka thënë se për të përcjellë një seancë, duhet bërë kërkesë të paktën 5 ditë më herët.

Lidhur me padinë, avokati i Sylës thotë se klientit të tij i është bërë padrejtësi.

© KOHA. Të gjitha të drejtat janë të rezervuara.

Padit Komunën e Gjakovës për uzurpim të banesës... by kohanet