Ferizaj mbështet fëmijët me aftësi të kufizuara

25 Janar 2017 - 12:34      

Kryetari i Komunës së Ferizajt, Muharrem Svarqa, nënshkroi një memorandum mirëkuptimi me Qendrën e kujdesit ditor “Pema”, për të mbështetur ofrimin e shërbimeve sociale për fëmijët me aftësi të kufizuara.

Memorandumi mundëson partneritetin e Komunës së Ferizajt dhe organizatës “Pema” në qasjen multidisiplinare dhe multisektoriale në ofrimin e shërbimeve, aktivitetet bashkërenduese, mbikëqyrjen dhe evaluimin e shërbimeve dhe planifikimin e qëndrueshmërisë së shërbimeve.

Më konkretisht, Komuna e Ferizajt, sipas memorandumit, veç aktiviteteve të tjera, do të zotojë fillimisht rreth 10 mijë euro, pastaj do të lobojë tek donatorët për sigurimin e afro 23 mijë eurove, për të mundësuar qëndrueshmërinë financiare të shërbimeve gjatë njëmbëdhjetë muajve vijues.

Nga këto shërbime, do të përfitojnë së paku 80 fëmijë me aftësi të kufizuara nga komuna e Ferizajt,si dhe familjet e fëmijëve të përfshirë në shërbime, organizatat e shoqërisë civile, etj. 

© KOHA. Të gjitha të drejtat janë të rezervuara.