Ndihmohen 100 familje me veshmbathje

21 Janar 2017 - 13:15      

Malishevë, 20 janar – Njëqind familje të Komunës së Malishevës, të enjten, janë ndihmuar me paketa veshmbathjeje, shtrojë dhe mbulojë. Këtë ndihmë për këto familje e ka ofruar Ministria e Punës dhe e Mirëqenies Sociale, në bashkëpunim me Qendrën e Punës Sociale të Malishevës dhe shoqatën “Nënë Tereza” në Malishevë, ka njoftuar Zyra komunale e informimit, shkruan sot Koha Ditore.

Me këtë rast, nënkryetari i Komunës së Malishevës, Rexhep Mazrreku, i ka falënderuar zyrtarët e kësaj ministrie për këtë ndihmë, të cilën e quajti “të mirëseardhur, pasi është e qëlluar në këtë kohë të stinës së dimrit”.

Sipas drejtorit të Qendrës së Punës Sociale në Malishevë, Blerim Begaj, përfitues të kësaj ndihme janë njëqind familje në asistencë sociale, kurse shpërndarja bëhet në bashkëpunim midis qendrës që ai drejton, MPMS-së dhe shoqatës “Nënë Tereza”.

© KOHA. Të gjitha të drejtat janë të rezervuara.