Lladrovci u kërkon drejtorëve me aktakuza lirimin e posteve të tyre

16 Janar 2017 - 20:46      

Kryetari i Komunës së Drenasit, Ramiz Lladrovci, ka kërkuar nga drejtorët ndaj të cilëve ka të ngritur aktakuzë, të lirojnë postet e tyre.

Siç bëhet e ditur përmes një komunikate për media nga kjo komunë, Lladrovci këtë kërkesë e ka drejtuar ndaj drejtorit të Administratës së Përgjithshme Komunale, Xhemë Binaku dhe drejtoreshës së Shërbimeve Publike dhe Emergjencë, Hyrije Xhemajlaj-Thaqi.

“Pas shkarkimit të katër zyrtarëve komunalë me aktakuza të ngritura, sot, në takim me drejtorët e drejtorive komunale, kam kërkuar që secili që ka aktakuzë të ngritur, të largohet nga detyra. Dy drejtorët politikë, drejtori i Administratës së Përgjithshme Komunale, Xhemë Binaku dhe drejtoresha e Shërbimeve Publike dhe Emergjencë, Hyrije Xhemajlaj-Thaqi, janë me aktakuza dhe tashmë nuk janë më drejtorë të drejtorive”, ka thënë Lladrovci.

KohaVisioni ka raportuar javën e kaluar për dallimet që Lladrovci kishte bërë kur suspendoi vetëm stafin civil nga puna por jo edhe atë politik, të cilët ishin pjesë e aktakuzës së njëjtë për keqpërdorim të detyrës zyrtare. 

© KOHA. Të gjitha të drejtat janë të rezervuara.