Standarde të dyfishta në Drenas, u suspenduan vetëm disa zyrtarë me aktakuza për keqpërdorim [video]

12 Janar 2017 - 21:30      

4 zyrtarë të Drenasit ditë më parë u suspenduan nga vendi i tyre i punës [video]

Këtë vendim kryetari i komunës së Drenasit, Ramiz Lladrovci, tha se e mori pasi u kuptua se ndaj tyre ekzistojnë aktakuza për veprën penale “keqpërdorim i detyrës zyrtare”.

Dy zyrtarët, Vehbi Jashari dhe Shyqeri Bublaku, u suspenduan pasi prokuroria në qershor të këtij viti ngriti aktakuzë për keqpërdorim, përkatësisht blerjen e një kamioni për fikjen e zjarrit për komunën e Drenasit, raporton KTV.

Por njëjtë nuk ndodhi me kolegen e tyre, drejtoreshën e Shërbimeve Publike dhe Emergjencës, Hyrije Xhemajlaj Thaçi, e cila gjithashtu është pjesë e kësaj aktakuze.

Arsyetimi i zyrtarëve të Drenasit për mosmarrjen e masave ndaj saj është se pozita e Hyrije Xhemajlaj Thaçit është staf politik në komunë.

Dobra nuk përjashton mundësinë që gjatë ditëve në vazhdim, kryetari i komunës të marrë masa edhe ndaj stafit politik që kanë të ngritura aktakuza. Asambleistët e kuvendit të Drenasit po konsiderojnë se suspendimet e zyrtarëve me aktakuza nisën mbrapsht.

Xhemajlaj Thaçi, konsideron se fillimisht duhet të pritet të përfundojë i gjithë procesi gjyqësor ndaj saj, para se të merren masa nga ana e komunës.

© KOHA. Të gjitha të drejtat janë të rezervuara.

4 zyrtarë të Drenasit ditë më parë u suspenduan... by kohanet