Ferizaj në gjendje emergjente

6 Janar 2017 - 09:08      

Reshjet e pandërprera të borës dhe era që po krijon ortekë të vazhdueshëm, e ka vështirësuar qarkullimin në komunën e Ferizajt, duke i bërë shumicën e rrugëve vështirë të kalueshme. Për këtë arsye, njofton kumtesa komunale, ekzekutivi komunal ka formuar shtabin emergjent dhe është mobilizuar për ta përballuar këtë situate, transmeton Koha.net.

Kryetari i Komunës, Muharrem Svarqa tha sot herët në mëngjes se i tërë stafi i tij është në gjendje gatishmërie dhe po përpiqet të mobilizojë të gjitha burimet njerëzore dhe teknike për t’u dalë ndihmë qytetarëve, ndërkohë që disa nga kompanitë më të mëdha që veprojnë në këtë komunë, tashmë gjenden në terren duke pastruar borën nga rrugët.

Kryetari Svarqa gjithashtu u bëri thirrje kompanive të tjera publike e private, që kanë mekanizëm adekuat për pastrimin e borës, institucioneve dhe qytetarëve që të mobilizohen për ta tejkaluar situatën e krijuar nga reshjet e fundit.

© KOHA. Të gjitha të drejtat janë të rezervuara.