E lë biznesin për shkak të shantazheve, nënshtetasi holandez akuzon MASHT-in për gjoba pa arsye [video]

25 Dhjetor 2016 - 19:14      

Kopshti i fëmijëve “Dielloni” në Vushtrri, ka ndërruar pronarin pas më shumë se 3 vjetësh, të menaxhuar nga Naser Dobroshevci, me kombësi shqiptare, por nënshtetësi holandeze.

Vendimin për t’u larguar nga ky biznes, Naser Doborshevci, thotë ta ketë marrë pas presioneve, që siç thotë, i janë bërë nga inspektorati i Ministrisë së Arsimit, por edhe ai i Mitrovicës, duke e dënuar dhe duke i bërë shantazhe për të vazhduar me këtë biznes, raporton KTV.

Sipas tij, zyrtarët e inspektoratit madje kanë kërkuar të nxjerrin para prej tij.

Muharrem Peci nga inspektorati rajonal i Mitrovicës, pohon se kushtet në këtë kopsht janë shumë të mira dhe vlerësohet si një ndër kopshtet që i plotëson kushtet e domosdoshme për fëmijë.

Meqë kritikat më shumë Naser Dobroshevci po i adreson karshi inspektoratit të Ministrisë së Arsimit, KTV-ja ka kërkuar të marrë përgjigje prej tyre.

Por, as pas katër ditë pritjeje nuk kanë kthyer asnjë përgjigje. Në Komunën e Vushtrrisë, pritet të bëhet një rinovim i çerdhes së qytetit, pasi ka nevojë për shumë përmirësime.

© KOHA. Të gjitha të drejtat janë të rezervuara.