Në Mitrovicë u përurua hapësira festive për fundvit

21 Dhjetor 2016 - 20:05      

Me prerjen e shiritit nga ana e kryetarit të komunës Agim Bahtiri dhe nënkryetarit Faruk Mujka, është përuruar në orët e mbrëmjes në Mitrovicë “Sheshi Festiv “, në të cilën do të zhvillohen aktivitetet e organizuara për shënimin e festave të fundvitit.

"Sheshi Festiv" përfshin hapësirën e shëtitores kryesore në qendër të qytetit të Mitrovicës, përkatësisht sheshet “Isa Boletini Mehe Uka dhe Adem Jashari”, transmeton Koha.net.

Bahtiri tha me këtë rast se qytetarët e Mitrovicës, edhe përkundër problemeve të shumta që kanë në jetën e përditshme meritojnë të kenë një ambient madhështor festiv.

“Komuna në bashkëpunim me qytetarët, bizneset, OJQ-të dhe shoqërinë civile, kanë kontribuar që zemra e Mitrovicës, të duket e mrekullueshme dhe të ofrojë kënaqësi për kremtimin e festave të fundvitit si asnjëherë më parë. Jo vetëm qendra e qytetit, por kësaj radhe janë dekoruar edhe pjesë të tjera të qytetit dhe unë jam i lumtur që në një ambient të këtillë dhe para juve qytetarë të nderuar, të ju uroj të gjithëve festat e fundvitit. Mitrovica djep i kulturës, i shkencës, arsimit, historisë, sportit e traditës, gjithsesi e meriton një ambient të këtillë festiv madhështor”, tha Bahtiri.

Pas fjalës së shkurtër para qindra qytetarëve, kryetari Bahtiri preu tortën festive, e cila ju shpërnda qytetarëve të pranishëm.

Komuna e Mitrovicës ka sigurua që hapësira prej 3000 m2 të jetë interaktive dhe festive për qytetarët, e cila do të ketë në funksion edhe: këndin artistik të fëmijëve, këndin e fotografisë, këndin “Hapësira performuese” dhe 10 shtëpizat prej druri.

© KOHA. Të gjitha të drejtat janë të rezervuara.