Në balotazh votuan rreth 5 për qind më shumë se në raundin e parë

18 Dhjetor 2016 - 19:48      

45.39% qytetarë me të drejtë vote kanë votuar në zgjedhjet e jashtëzakonshme për kryetar komune në Drenas.

Kjo është bërë e ditur në konferencën e fundit të KQZ-së. Kryetarja Valdete Daka ka thënë se në këtë përqindje nuk përfshihen votat me kusht dhe të personave me aftësi të kufizuara. Të drejtën për votë në këtë balotazh e kanë shfrytëzuar 23861 qytetarë.

Daka ka thënë se të gjitha qendrat e votimit janë mbyllur me kohë dhe nuk ka pasur parregullsi.

KQZ po ashtu ka njoftuar se në balotazh të drejtën për votë e shfrytëzuan rreth 5 për qind më shumë votues në krahasim me raundin e parë. Në raundin e parë kishin votuar 40.55 për qind të votuesve.

Anëtarët e KQZ-së kërkuan raport të detajuar lidhur me rastin në Nekovc ku raportohet se 30 persona janë lejuar të votojnë pavarësisht se në gishtërinj të tyre ka pas gjurmë të sprejit.

Për konferencën e radhës ku edhe pritet të shpallen rezultatet e para Daka ka thënë se do të njoftohemi me kohë.

© KOHA. Të gjitha të drejtat janë të rezervuara.