“Deri në orën 13, votuan rreth 20 për qind e qytetarëve”

18 Dhjetor 2016 - 14:48      

Visar Sutaj nga KDI, në një konferencë për media, tha se deri në orën 13:00, rreth 20 për qind e votuesve kanë dalë në votime.

Ai i ka përsëritur parregullsitë që kanë ndodhur gjatë ditës së sotme, duke theksuar 67 raste të mossaktësisë në listat e votuesve, 54 raste të votimit familjar, e të tjera.

“Një problem tjetër janë rastet e votimit të votës në shkollën në Gllokoc e që komisionerët nuk kanë ditur si të veprojnë. Rast tjetër është asistimi te votuesit nga i njëjti person. Kjo ka ndodhur në Gllanasellë. Në 4 vendvotime, vëzhguesit nuk janë ulur prapa komisionerëve duke vështirësuar punën e tyre. Ka ripërsëritje të parregullsive që i kemi gjetur edhe më herët”, ka thënë Sutaj, ndërsa ka theksuar se pjesëmarrja në votim është mjaft e ulët, raporton KTV.

Ai ka thënë se në Nekoc janë shtuar rastet e tentimeve të votimeve të dyfishta “që tregon se ka tendencë nga partitë që të ndikojnë tek votuesit e tyre”.

Sutaj ka theksuar se janë shënuar edhe 6 raste të fotografimit të votës.  

© KOHA. Të gjitha të drejtat janë të rezervuara.